Gin-akusaran sang Chinese Embassy in Manila si Philippine Coast Guard (PCG) spokesperson para sa West Philippine Sea nga si Jay Tarriela sang ginaalegar pagbinutig may kaangtanan sa mga operasyon sang PCG sa West Philippine Sea.
Sa pahayag ni Deputy Spokesperson Guo Wei, hugot nga ginsiling sang embahada nga wala sang kamatuuran ang ginsiling ni Tarriela nga maskin san-o wala nagpalapit ang mga barko sang PCG sa mga reef kag bahura nga ginapagdumlahan sang China. Gintumod sang embahada ang ginaalegarmasobra 200 nga pagpalapit kag overflight sang PCG sa mga lugar kasubong sang Spratly Islands, kalakip ang Meiji Jiao ukon Mischief Reef, Nanxun Jiao, kag Zhubi Jiao.
Ginpamangdan man sang embahada ang mga tawuhan sang Pilipinas sang plano nga pag-akopar sa pila ka mga uninhabited features kasubong sang Tiexian Jiao (Sandy Cay) kag Xianbin Jiao (Sabina Shoal), kag liwat nga ginsambit ang isyu sa Ren’ai Jiao ukon Ayungin Shoal. Hugot man sini nga ginsiling nga kaangay ginalapas sang Pilipinas ang Declaration on the Conduct of Parties kag ang United Nations Convention on the Law of the Sea.
Nahibaluan nga ang pahayag sang embahada amo ang sabat sa una nga statement ni Tarriela sang Pebrero 13, kun sa diin hugot niya nga ginsiling nga wala nagapalapit ang PCG sa mga iligal nga gina-akopar nga maritime features sang China sa WPS.
