Ginhangkat sang Chinese Embassy ang mga senador kag kongresista sang Pilipinas nga padayunon ang panawagan nga ideklarar si Chinese Ambassador Jing Quan nga persona non grata, kasunod sang iya pahayag nga mahapos lang magdaug ang China kun maglala ang tensyon sa West Philippine Sea.
Sa social media, ginpahayag sang embahada nga dapat untaton sang mga kongresista kag mga senador ang ginaalegar pagpamahog kon indi sila magpadayon sa amo nga mga tikang.
Gintarget man sang embahada si Philippine Coast Guard spokesperson for the West Philippine Sea Commodore Jay Tarriela, matapos gin-akusaran nga nagpamahog kay Jing. Apang ginpanginwala ni Tarriela ang interpretasyon sang embahada kag ginpanindugan nga sala ang translation sang iya pahayag.
Una na nga ginpakamalaut sang pila ka mga mamalidha, Department of Foreign Affairs kag Department of National Defense ang pahayag ni Jing nga ginakabig sang mga opisyal nga pamahog sa Pilipinas.
Padayon nga nagalala ang tensyon sa tunga sang Pilipinas kag China bangud pareho nila nga ginaangkon ang West Philippine Sea.
