MANILA, Philippines – Ginpahayag sang National Task Force for the West Philippine Sea (NTF-WPS) nga wala na sa sulod sang Panatag Shoal ukon Bajo de Masinloc ang Chinese floating platform nga una nga namonitor sa lugar, matapos magpahamtang ang Pilipinas sang diplomatikong protesta batok sa China.
Suno sa NTF-WPS, ang pinakabag-o nga monitoring kag patrol operations sang Miyerkules nagkumpirmar nga nahalin na ang amo nga estruktura sa shoal.
Sang Martes sang gab-i, gin-ako sang Chinese Embassy sa Manila ang presensya sang platform kag ginpahayag nga isa ini ka temporaryo nga pasilidad para sa siyentipiko nga panaliksik nga ginpatigayon sang South China Sea Institute of Oceanology sang Chinese Academy of Sciences.
Ginsiling sang embahada nga ang platform gin-gamit bilang sampling kag experimental facility para sa pagtuon sang ekosistema sang shoal kag para sa mga programa sa pagpanalipod sang kalikupan, kag nga natapos na ang ila research mission.
Apang, ginpabutyag ni Philippine Coast Guard spokesperson Rear Admiral Jay Tarriela nga wala sang otorisasyon ang amo nga panaliksik kag ginhamon ang China nga ipaguwa sa publiko ang mga datos nga ila natipon.
Ginpanindugan sang Pilipinas nga sila lamang ang may legal nga kinamatarong nga magpatigayon sang marine scientific research sa Panatag Shoal.
Ang platform una nga namonitor sang Mayo 25 sa patrol flight sang Philippine Coast Guard kag Bureau of Fisheries and Aquatic Resources (BFAR). Ang estruktura may ginatantya nga 30 square meters nga deck area kag may apat ka metal stilts nga nagapabilin sini nga matatag sa isa ka lugar.
Bangud sini, nagpasaka ang Pilipinas sang diplomatikong protesta kag nagpangayo sang madali nga pagpahalin sang platform.
Samtang nahalin na ang floating platform, ginpahayag ni Tarriela nga nagpabilin pa sa Panatag Shoal ang isa ka gamay nga Chinese vessel nga Yue Xia Yu Zhi 20028.
Padayon naman nga ginpabutyag sang NTF-WPS nga ang Pilipinas lamang ang may katungod sa pagpatindog sang mga estruktura kag pagpatigayon sang mga aktibidad sa Panatag Shoal kag sa iya territorial sea.
Ginpahayag man sang task force nga magapadayon ang Armed Forces of the Philippines, Philippine Coast Guard kag BFAR sa ila regular nga maritime patrols kag monitoring operations agud maprotektahan ang soberanya kag mga kinamatarong sang pungsod sa West Philippine Sea.
