Ginaberipika na sang Armed Forces of the Philippines (AFP) ang Chinese military drills sa may Bajo de Masinloc sa West Philippine Sea.
Suno kay AFP public affairs office chief Col. Xerxes Trinidad, ila na ginkumpirma ang kamatuuran kaangut sa reports nga ginpahulag suno sang People’s Liberation Army sang China ang ila nga armed forces agud sa paghanas sa kadagatan sa may Bajo de Masinloc.
Ginhimo sang AFP official ang pahayag kasunod sang ginpaguha nga statement sang PLA sining Huwebes nga gin-organisa sang Southern Theater Command ang ila nga naval kag air forces agud maghiwat sang combat readiness patrols sa kadagatan, kahanginan kag palibot sang Bajo de Masinloc nga ginatawag sang China bilang Huangyan Island.
Ang Bajo de Masinloc nga ginatawag man bilang Scarborough shoal kag Panatag shoal ang yara sa 124 nautical miles humalin sa baybayon sang Zambales nga sulod sa 200 nautical miles sang exclusive economic zone sang Pilipinas nga pilit gina-angkon sang China nga parte sang ila nga territorial waters.
