Liwat nga nagkitaay ang Presidente sang China kag United States (US) nga si President Xi Jinping kag President Joe Biden ini matapos ang ginpatigayon nga APEC Summit sa Lima, Peru.
Diri ginpahayag ni Xi nga indi dapat mag-intra ang US sa agaway sang teritoryo sa Spratly Islands sa West Philippine Sea (WSP).
Mahibaluan nga gin-reject sang Beijing ang 2016 ruling nagikan sa Permanent Court of Arbitration, kun sa diin ginpahayag sang korte nga ang pagpangsakop sini sa WPS ang wala sang legal nga basehan.
Sa isa pa nga pahayag ginpaanggid ni Xi ang pag-updanay sang US nga kun ang duha ka punsgod suno diri ang nagakabigay bilang mag-abyan kag may pareho nga tinutuyo nga magbuligay ang makaangkon sang maayo nga progreso apang kun ikabig sang mga ini nga magkontrahanay suno po kay Xi makaangkon sang madalom nga kompetisyon tubtob maglab-ot sa sakitanay.
Ginpahayag ni US national security adviser Jake Sullivan nga nag-istoryahanay ang duha ka lider sa pribado nga hotel kun sa diin nagatinir si Xi kag nagdugay sang duha ka oras ang nasambit nga pag-istoryahanay sa diin ginbalikan ang madugay nga relasyon kag kaangtanan sang China kag US.
Dugang pa nga indi man masami nga nagakasugtanay ang ila nga mga diskusyon apang nangin prangka suno diri ang duha ka lider sa isa kag isa angut sa nagkalain-lain nga isyu.
Kaangut pa sini nagpromisa si Xi nga ipabilin niya ang kaangtanan nila ni US President Elect- Donald Trump kun sa diin matandaan nga nag-aslom ang ila nga relasyon sa tunga sang trade disputes kag origin sang COVID-19.
Nagpromisa man si Biden nga buhinan niya ang tensyon sa China nga nagapalala pa sa iban pa nga mga issue kasubong sang posibilidad nga paggamit sang nuclear weapons nga mahimo nga makahalit sa kumunidad.
Ginlaragway naman sang White House nga ini na ang labing-una nga paghinalaay sang duha ka punsgod angut sa isyu sang paggamit sang nuclear weapons nga suno kay Xi kag Biden indi artificial intelligence ang kinahanglan nga masunod sa pagdikta sang paggamit sang nuclear weapons agud masalbar ang madamo nga kabuhi.
