ROXAS CITY – Nakasugod na sa pag-imbestigar ang Commission on Human Rights (CHR) Region 6 sa gin-conduct nga Simultaneous Serving Search Warrant sang mga pulis sa mga tumandok sang Tapaz, Capiz kag Calinog, Iloilo.
Ini ang ginpahayag ni Commission on Human Rights Region VI Director Atty. Jonnie Dabuco sang mainterview sang Bombo Radyo.
Ginpahayag sini nga nakapadulong na sila sa nasambit nga banwa matapos ang natabo nga operasyon.
Suno kay Dabuco nga nagpangusisa na sila kun may paglapas sa tawhanon nga kinamatarong ang mga otoridad nga nag resulta sa pagkamatay sang siyam ka mga indibidwal sa amo nga banwa.
Dugang pa sini nga ginahibalo pa nila sa karon kun nasunod sang ensakto ang rules and procedures sa ginpatigayon nga operasyon.
Ginaalegar nga may iban nga pamilya nga ginpwersa nga sudlon ang ila balay nga wala sila nakahibalo, planted ang operasyon, pagtaya sang armas luthang, pagpahapa sa duta kag pagluthang patay sa ila mga himata.
Magluwas diri, hugot man nila nga ginpanginwala nga nagbato ang ila mga himata sa mga otoridad kadungan sang pagserbi sang search warrant.
Sa tion nga mapamatud-an nga matuod ang mga alegasyon sang mga himata sang mga subject sang operasyon, magapangatubang sang panumbungon ang mga otoridad.
Natalana naman nga ipaidalom sa forensic examination ang mga bangkay sang ini agud mabal-an kun nagbato man gid ukon wala ang nasambit nga mga indibidwal.
Matandaan nga natabo ang nasambit nga operasyon sadton Disyembre 30, 2020 kun sa diin nagresulta sang pagkamatay sang siyam ka mga indibiwal kag pag-aresto sa iban pa nga 10 ka mga indibidwal sa amo nga banwa.
