Ginhatagan pagtamod ni Vice President Sara Duterte ang importansya sang pagpaambit sang bugay kag pagpalangga sa isigkatawo, ilabi na sa mga sektor sang katilingban nga nagaeksperyensya sang tuman nga kabudlayan.
Suno kay Vice President Duterte, sa iya mensahe subong nga panahon sang paskwa, sa tagsa ka tion sini nga panahon ginapahanumdom kita sang mga bugay nga dala sang pagkatawo ni Jesus.
Apang sa pihak sang mga pagpanghangkat sa kabuhi, ang selebrasyon mangin mas makahulugan kon ini magatapos sa pagbulig sa mga nagakinahanglan, mga masakiton, mga ilo, mga wala sang puluy-an, mga biktima sang kalamidad kag kalakasan, kag mga sektor nga masami nagaeksperyensya sang pagpatumbaya.
Ginpangabay man sini ang publiko nga magpangamuyo para sa kalinong kag katawhay sang Pilipinas, kadungan sang paghandum sang malipayon kag matawhay nga paskwa sa tanan nga mga Pilipino.
