CAPIZ – Gin-isa isa sang Pontevedra PNP ang natabo sang Hulyo 20, sa diin ginluthang-patay si Police Captain Rian Ampoyos, myembro sang 1st Capiz Provincial Mobile Force Company.
Ini na ang final investigation sang kapulisan matapos matipon ang testimoniya sang mga testigo, ebidensya kag Closed Circuit Television (CCTV) footage.
Las 12:03 sang kaagahon sang Hulyo 20 sang nabaton sang Pontevedra Municipal Police Station ang report nga may yara sang insidente nga natabo sa KTV Bar sa Barangay Binuntucan, Pontevedra.
Las 12:07 sang kaagahon, nag-abot ang kapulisan kag nadakpan ang isa sa tatlo ka mga suspek nga si William Paulino Deocampo sa diin nakuha sa iya ang caliber 45, magazine nga may chamber, kag may isa pa gid ka magazine nga loaded sang lima ka ammunitions.
Sang ginrekisahan ini, nakuha pa gid sa iya ang isa ka magazine nga may anum ka mga ammunitions.
Las 3:40 sang aga sang amo nga adlaw, nag-abot sa lugar sang insidente ang Capiz Provincial Forensic Scene of the Crime Operation (SOCO) team kag nagpatigayon sang crime scene processing kag natapos man las 5:30 sang aga.
Las 3:45 sang aga, na-recover sang intel operatives sang Pontevedra Municipal Police Station ang isa ka motorsiklo nga wala sang plate number sa Sitio Buta, Barangay Jolongajog.
Amo ini ang ginapatihan nga getaway vehicle sang duha ka mga suspek.
Sa ginpatigayon nga follow up investigation, ginsugid ni Deocampo nga ang iya mga upod amo sanday alyas Boy kag alyas Juan.
Gin-presenter sang imbestigador ang facebook photos nanday alyas Boy kag alyas Juan sa tag-iya kag empleyado sang KTV bar kag sa duha ka mga kapulisan nga upod ni Ampoyos nga isa ka Police Corporal kag isa ka Police Staff Sergeant sa diin positibo nila nga gin-identify ang duha ka mga suspek.
Gintumod man sang police officers nga si alyas Boy amo ang nangamot ukon nagluthang-patay kay Ampoyos.
Las 12 sang udto sang amo nga adlaw, nagpadulong sa Dumarao Municipal Police Station sanday Police Captain Mark Anthony Garcia, hepe sang Pontevedra MPS kaupod si PLt.Col. Athemius Devaras, head sang Provincial Intelligence Unit agud ma-validate ang identities kag address sang duha ka mga suspek.
Sa imbestigasyon nga na-establisar sang kapulisan, si alyas Boy nga amo ang nagluthang kay Ampoyos, ang positibo man nga gin-identify sang eyewitness kag base sa CCTV footage.
Wala sang armas si Ampoyos sang amo nga tion.
Sandig sa testimoniya sang mga testigo kag sa CCTV footage, nag-report sa tag-iya ang waiter nga may yara sang armas nga dala ang mga suspek rason nga ginpahibalo ini sang tag-iya kay Ampoyos.
Nagpalapit si Ampoyos sa lamesa sang tatlo ka mga suspek kag gin-usisa kun may dala gid man ang mga ini sang armas.
Apang gilayon na lang siya nga ginluthang ni alyas Boy sa diin naigo ang biktima sa iya nawala nga dughan.
Nagpalagyo sanday alyas Boy kag alyas Juan kag nabilin sa sulod sang KTV bar si Deocampo rason nga napunggan ini sang tag-iya, mga empleyado kag customer tubtob nga nag-abot ang mga pulis.
Nahibaluan nga kahapon, na-file na ang kaso nga murder kag paglapas sa Republic Act 10591 ukon Comprehensive Firearms and Ammunition Regulation Act batuk sa mga suspek.
Ini bangud sanday Deocampo kag alyas Juan ang nag-ugyon ukon nag-conspire kay alyas Boy sa paghimo sang krimen, gani pareho sila nga ginakabig nga may kriminal nga responsibilidad sa kaso.
