ROXAS CITY – Nagalaum ang Criminal Investigation and Detection Group (CIDG)-Region VI, nga madamo sang mga tagreklamo ang magapadulong sa ila talapatan agud magpasaka sang nagakaigo nga reklamo batuk sa babayi nga nadakpan sa entrapment operation sa isa ka mall sa Mandurriao, Iloilo City.
Sa interview sang Bombo Radyo kay PMaj. Jess Baylon, Regional Chief Investigator sang CIDG ginpahayag sini nga, nagpatigayon ang ahensya sang verification kag nagdugay sang tatlo ka semana nga pagmonitor antes ginkasa ang entrapment operation.
Nagagamit sang pangalan nga Melvelyn Daradar kag Maria Evelyn Daradar ang nasambit nga babayi, nagapang-edaron sang 24-anyos kag nagpakilala nga taga Barangay Dayao, Roxas City.
Nahibaluan nga gingamit sang babayi ang pangalan sang isa ka Real Estate Company apisar nga indi ini konektado sa amu nga kompanya.
Suno diri nga handa magkooperar ang tagdumala sang nasambit nga kumpanya batuk sa makabig nga “professional scammer” sa real estate.
Magapangatubang ang nadakpan sa kaso nga paglapas sa Article 315 sang Revised Penal Code ukon estafa kag falsification of identity.
