ROXAS CITY – Ginpasakaan na sang Criminal Investigation and Detection Group ukon CIDG-Capiz sang panumbungon nga paglapas sa RA 11469 ukon (Bayanihan to Heal as One Act) kag RA 3019 (Anti-Graft Corruption Practices Act) ang apat ka mga opisyales sang barangay matapos nga napamatud-an nga may yara sang anomaliya sa pagpanagtag sang Social Amelioration Program (SAP) sa Barangay Linao, Panay Capiz.
Ini ang ginpahayag ni CIDG-Capiz Chief Police Major Chris Artemius Devaras sang mainterview sang Bombo Radyo.
Suno kay Devaras nga ginpasaka na ang panumbungon sa provincial procecutors office batuk kanday Barangay Kapitan Tito Barnuevo, Barangay Kagawad Cleope Billanes, Barangay Secretary Marcelyn Bibal kag Barangay Treasurer Teresa Arabia.
Ini matapos nga nakabaton sila sang reklamo gikan sa pila ka mga pumuluyo sang amo nga barangay angut sa ginaalegar kaltasanay sang SAP.
Matandaan nga ginpangkaltasan sang tag-P950 ni Barnuevo ang P6,000 nga ayuda nga nabaton sang mga lumon.
Magluwas dri, ginkaltasan man ni Barnuevo sang tag-P3,210 ang mga indi lumon nga nakabaton sang amo nga ayuda.
Ginapahayag nga nagpasugot ang mga benepisyaryo nga kaltasan ang nabaton nga ayuda bangud ginpahog ini sang punong barangay nga indi makabaton sang masunod nga ayuda sa tion nga indi sila magpasugot.
Matandaan nga una na ginpasakaan sang panumbungon si punong barangay Marilyn Blanco sang Barangay Lanipga kag Punong Barangay Rosemarie Puyon sang Barangay Sta. Carmen banwa sang Dumalag kalakip na ang pito ka iban pa nga mga barangay kagawad bangud sa anomaliya sa pagpanagtag sang nasambit nga ayuda sa ila barangay.
