Gina-usisa na sang Philippine National Police – Criminal Investigation and Detection Group kon sin-o ang posible naghatag sang sayop nga impormasyon kay suspended Senate Acting Sergeant-at-Arms nga si Mao Aplasca nga ginasiling isa sa mga rason kun ngaa nagluntad ang pagpangluthang sa Senado sang Mayo 13.
Suno kay Robert Morico II, ginapangita sang mga imbestigador kon sin-o ang naghatag kay Aplasca sang impresyon nga “under attack” ang Senado, nga nagresulta sa pagpanghanda sang mga security personnel para sa armado nga komprontasyon. Ginpahayag man niya nga antes natabo ang insidente, nagmandu si Aplasca sa mga guwardiya nga mag “lock and load.”
Dugang pa ni Morico, posible nga nagluntad ang ginatawag nga “panic firing” bangud nagapati ang mga personnel nga may nagasulong sa ila, bisan wala man sang amo sina nga sitwasyon. Ginpunto man niya nga indi lamang si Aplasca ang nagadesisyon sa amo nga mga hitabo bangud may yara man siya sang mga deputy sa Office of the Sergeant-at-Arms ukon OSAA.
Ginahayag man sang opisyal nga malikawan tani ang insidente kon may insakto nga koordinasyon kag komunikasyon sa tunga sang OSAA kag security personnel sang katupad nga Government Service Insurance System building.
Samtang, nagpanawagan ang CIDG sa mga personnel sang OSAA nga makigkooperar sa nagapadayon nga imbestigasyon matapos nga wala anay nakatubang ang pila sa ila sa mga imbestigador. Una na man nga ginrekomendar sang CIDG ang pagsaka sang kaso batok kay Aplasca kag duha pa niya ka personnel may kaangtanan sa gin-alegar paglapas sa Private Security Services Industry Act.
