ROXAS CITY – Pagatutukan sang Criminal Investigation and Detections Group (CIDG) ang pag-imbestigar sa ginaalegar mga opisyal sang gobyerno nga may iregularidad ukon anomaliya nga ginahimo sa distribusyon sang ayuda sa idalom sang Social Amelioration Program (SAP) sang Department of Social Welfare and Development (DSWD).
Ini ang ginpahayag mismo sang pinuno sang CIDG-Region 6 mnga si Police Colonel Gervacio Balmaceda.
Suno sa opisyal nga nagabaton ang ila hanay sang mga reklamo natuhoy sa mga anomaliya may kahilabtanan sa listahanay sang SAP beneficiaries kag distribusyon sang amo nga ayuda.
Mahimo lamang suno diri nga magpalapit ang sinuman nga luyag magreklamo sa ila talatapan agud gilayon ini nga maimbestigahan.
Posible man suno diri nga magpatigayon sila sang case build-up operations batuk sa mga opisyal nga may ginahimo nga iregularidad.
Ginpasalig sini nga pagahimuon sang ila nga hanay ang tanan bangud ini ang ila mandatu pinaagi man sa bulig sang Department of Interior and Local Government kag DSWD.
