ROXAS CITY – Nagpatigayon sang oplan baklas ang City Comelec kaupod ang Department of Environment and Natural Resources (DENR) kag Department of Public Works and Highways (DPWH) sa mga tarpaulin sang mga nagakandidato sa local kag national elections nga over size ukon dalagkuan nga mga campaign materials.
Sa interview sang Bombo Radyo Roxas kay Atty. Romel Benliro, City Comelec Supervisor, ginpahayag sini nga region wide ang pagpatigayon sang oplan baklas sa mga dalagkuan nga posters sang mga kandidato.
Suno kay Benliro, nga ila pagakakason ang kutob dalagkuan nga mga poster bangud ang ginatugutan gid lamang nga size ang limitado lang sa 2×3 kag dapat yara man sa insakto nga lugar ang pagabutangan sini.
Dugang pa sang City Comelec Supervisor nga apisar yara sa insakto nga size ang mga tarpaulin apang ginbutang sa mga lugar nga indi dapat butangan ila sa gihapon ini pagakuhaon.
Ginpahayag sini nga bawal butangan sang campaign materials ang mga barangay hall, Public Market, Public Terminals kag ilabi na ang mga tulay.
Gintuad man sini nga nakadependi na sa DENR kun may yara sila sang direktiba nga ginapatuman nga ila pagakakason ang mga poster sang mga local aspirant kag national candidates nga yara nagatapik sa mga puno sang kahoy.
Bangud ang concern gid lamang sa karun sang City Comelec amo ang mga poster nga dalagkuan kag yara nakabutang sa mga ginabawalan nga lugar. Nagapangabay man ini sa mga nagakandidato sa local kag national elections nga magsunod sa ginatugot nga size sang campaign materials kag sa lugar nga dapat pagabutangan sini.
