ROXAS CITY – Dismayado ang Comelec election officer sang syudad sa manubo nga turn out sang voter’s registration para sa Barangay and Sk election.
Sa nabilin nga adlaw antes magtakup ang rehistrasyon, nagdangat lamang sa masobra 4mil 900 ang numero sang mga nagparehistro sa city comelec office.
Ginpahayag ni Atty. Joemar Betita humalin sang bulan sang Agosto nga nagsugod ang voter’s registration kag magatakup buwas nga adlaw sang Lunes, Septiembre 30, 2019 manubo ang numero sang mga nagparehistro.
Magluwas diri may 12mil ka mga botante ang gin-deactivate ukon ginkuha sa listahan matapos napaslawan nga makaboto sa duha ka magkasunod nga eleksyon.
Suno kay Betita nga naghimo na sang tikang ang talatapan agud maganyat ang iban nga wala nakaparehistro kasubong sa ginpatigayon nga satellite registration sa diin nagapadulong sila sa mga eskwelahan, mall registration kag pagpalab-ot sang impormasyon sa publiko pinaagi sa Bombo Radyo.
Pila sa nakita nga factor sang opisyal nga naghina ang numero sang mga nagparehistro amo ang ginbuy-an nga pahayag ni President Rodrigo Duterte nga naluyag nga mapaiway ang Barangay and SK election sa masunod nga tuig sa diin nagdumdum ang iban nga indi madayon ang eleksyon.
Samtang liwat ginpahanumdum ni Betita ang luyag magparehistro nga tobtob na lamang sa Septiembre 30, 2019 ang katapusan nga adlaw sang voter’s registration kag wala na sang extension nga matabo.
Suno diri nga magaakomodar lamang ang Roxas City Comelec Office sang 350 ka mga indibidwal nga luyag magparehistro para makaboto sila sa eleksyon.
Patigayunon ang last day of registration sa Dinggoy Roxas Civic Center humalin las 8 sa aga tobtob las 5 sa hapon lamang.
