ROXAS CITY – Naghatag sang iya nga sabat si City Councilor Midelo Ocampo kasunod sang mga alegasyon sa iya sang nagtal-os sa iya nga punong barangay sang Barangay Milibili, Roxas City nga si Annabel Roxas.
Suno kay Ocampo nga nasubuan ini para sa mga pumuluyo sang Barangay Milibili bangud sang alegasyon ni Roxas nga ginsabotahe sini ang konseho sang barangay rason nga wala ini malakip sa Top 20 Barangays sa 2019 Barangay Excellence in Local Governance (Barangay Excell) sang Department of Interior and Local Government (DILG).
Ginpahayag ni Ocampo nga wala sang kamatuoran nga wala sang mga dokumento ang barangay sa pagtal-os ni Roxas sa pagka-kapitan bangud sadtong Hunyo 27, 2019, ginpresentar pa ang mga dokumento sang barangay sa evaluating team gikan sa DILG.
Ginsundan pa ini sang evaluation sang national evaluator para sa Lupong Tagapamayapa Award sadtong Hulyo 24, 2019.
Pag-abot naman sa ginaalegar ni Roxas nga unliquidated funds sang nakaligad nga administrasyon, gintadlong ni Ocampo nga wala nahangpan ni Roxas ang report gikan sa Commission on Audit (COA).
Suno kay Ocampo nga ang 6 milyones pesos nga ginatumod sang COA ang amount ukon kantidad sang mga propeidad sang barangay kag indi ini sang cash nga wala ma-liquidate.
Pag-abot naman sa alegasyon nga ginpang-delete ni Ocampo ang files sang computer sa ila barangay, suno sa konsehal nga ginbilin sini ang tanan nga hard copy sang mga dokumento sang barangay antes siya nagbiya bilang kapitan.
Ginklaro man ni Ocampo nga obligasyon ni Roxas nga bayaran ang bill sang kuryente, tubig kag internet sang barangay bangud may pondo para diri rason nga wala sang kamatuoran nga nag-disponer siya sang kwarta para mabaydan ang nasambit nga mga bills.
Kuntani suno kay Ocampo, indi magbinutig kag maghimo-himo sang estorya si Roxas bangud para kay Ocampo, antes siya nagbiya bilang kapitan, madamo na siya sang gintanom nga kaayuhan para sa pangginobyerno sang Barangay Milibili.
