ROXAS CITY – Dismayado ang konseho sang syudad sa mga nangin rason sang Department of Public Works and Highways (DPWH) Capiz 1st Engineering district, sa ginpatawag nga pagsinapol, sang damlang lang.
Sa interview sang Bombo Radyo kay City Councilor Atty. Albert Gregory ‘Gary’ Potato, ginpabutyag sini nga nagalaum sila kuntani nga magatambong ang chief sang construction division sang Capiz 1st Engineering District sang DPWH nga si Engr. Julius Abela, agud nga masabat ang ila pamangkutanon, apang sa baylo, project engineer ang nagtambong sa amu nga hilinun-anon, nga suno sa Konsehal palain-lain ang sabat sang enhinyero.
Dugang pa ni Potato, todo-panginwala ang DPWH nga may kapaltahan ang ila mga proyekto, bangud sa mga rason kaangay sang panahon kag nag-apply sang extension ang contractor para sa ‘curing period’.
Bnagud sini, natingala ang mga Konsehales kun ngaman ginpasugtan sang DPWH nga mag-extend sang kapin 1 ka bulan ang contractor para sa ‘curing period’ sa may bahin sang Rizal St., bangud sa iban nila nga proyekto nahimo man nila nga dali-dalion ang pag-aspalto.
Panugyan sang City Council nga kuntani intsaktuhon sang DPWH ang ila pagtrabaho, bangud kuwarta sang pumuluyo ang ginagamit diri.
