ROXAS CITY – Plano karon nga mag-isyu sang executive order sang alkalde sang siyudad kag magpapasar sang resolusyon ang miyembro sang city council natuhoy sa ginpatuman nga 24 hours curfew para sa mga senior citizens kag estudyante subongman sa mga menor de edad bangud sa pamahog sang Coronavirus Disease (COVID19) pandemic.
Ini ang ginpahayag mismo ni City Councilor Midelo Ocampo sang mainterview sang Bombo Radyo Roxas.
Suno kay Ocampo nga ginatun-an pa nila sa konseho kun ano ang mas maayo para sa mga pumuluyo.
Dugang pa sang konsehal nga tinutuyo lamang sang gobyerno nga makontrol ang paglagaw sang mga senior citizens ilabi na sa mga naga-edad sang 65-anyos pataas kag mga estudyante bangud sila ang vulnerable sa amo nga balatian.
Sa tion nga mahitsu ang nasambit nga ordinansa, indi lamang mga estudyante ang kalakip sa curfew hours subongman ang mga menor de edad, nagaeskwela man ukon wala.
