ROXAS CITY – Wala nahadlok si City Councilor John Paul Arcenas, sa mga pagpamahog sang pila ka mga motorista kag pumuluyo nga indi siya pagbotohon sa masunod nga eleksyon bangud sa pagduso sang No Helmet Ordinance sa syudad sang Roxas.
Sa interview sang Bombo Radyo kay Arcenas, ginpahayag sini nga tinutuyo sang amu nga ordinansa agud maproteksyonan ang tanan ilabi na ang mga motorista nga adlaw-adlaw nagapasimpalad sa dalan.
Matigdas man nga ginsiling sang konsehal nga indi siya pagpahugon bangud lamang sa iya ginduso nga pagsulundan bangud wala ini nagakabuhi sa pulitika kag wala ini nagasalig sa pwesto nga may yara siya subong.
Ini matapos, may yara sang pila ka mga motorista kag pumuluyo ang nagpahayag kag may disgusto sa nasambit nga ordinansa bangud suno diri maawat sa ila nga pagbyahe.
Suno kay Arcenas, indi na kun tani paghulaton pa nga may madula nga kabuhi antes magbaka-baka sa pagbakal kag pagsuksok sang helmet, bangud ba-se sa datos nagikan sa kapulisan kalabanan nga rason sang mga nagakalamatay sa aksidente ang kakulangan sa pagsuksok sang helmet.
Apisar nga may yara man sang helmet ang iban, wala ini ginasuksok kag gina-uyatan lamang.
Nagalaum man ang nasambit nga konsehal nga ma-amat-amat nga batunon kag sundon sang tanan ang amu nga ordinansa agud mapahagan-hagan na ang numero sang mga nagkalamatay bangud sa aksidente.
