ROXAS CITY – Nagakatingala si City Councilor Atty. Gary Potato, kun ngaman nga madugay na nga wala sa gihapon makay-o sang contractor ang dalan sa Rizal St., nga sakup sang Barangay VII, sini nga syudad.
Sa interview sang Bombo Radyo kay Potato, ginpahayag sini nga indi ini proyekto sang syudad, gani wala siya sang matandaan nga may ginpasaka nga request sa ila sa konseho agud gub-on ang nasambit nga dalan.
Bangud sini, nangin kaungdan sang iya diskurso prebilihiyo ang paghinyo sa komitiba sang Infrastructure agud hibaluon kag paimbestigahan kun ano ang problema sa pagpabaya sang contractor sa amu nga proyekto.
Ginpahayag ni Potato nga indi maayo ang ginahimo sang contractor bangud madamo sang mga apektado maghalin sa mga motorista, negosyante kag bisan ordinaryo nga tawo sa nasambit nga huol sa karsada.
