ROXAS CITY-Ginaduso sang chairman sang Committee on Health and Sanitation sang Sangguniang Panlungsod nga magdihon sang isa ka ordinansa nga ma-regulate ang paghaboy sang higko gikan sa mga septic tank sa mga establisyemento sa siyudad.
Ini ang nangin sentro sang privilege speech ni City Councilor Cesar Yap Jr., sa ginpatigayon nga session sang City Council.
Suno kay Yap nga naalarma ini sa natabo nga fish kill sa mga fish cages sa Cadimahan River.
Nagapati ini nga indi lang oil spill ang gintunaan sang pagkamatay sang mga isda, kundi ang mga higko nga yara sa suba.
Ginpahayag pa ni Yap nga kinahanglan nga may yara sang ordinansa agud maobligar ang mga establisyemento nga magpahamtang sang mga water treatment facility agud masala kag masiguro nga hilway sa mikrobiyo ang mga higko nga nagahalin sa mga septic tanks nga ginahaboy sa suba.
Dugang pa ni Yap nga sa tion nga mapapasar ang nasambit nga ordinansa, may yara sang nagakaigo nga penalidad ukon multa ang magalapas nga mga establisyemento.
Samtang pagatutukan man sang konsehal ang mga ilegal settlers sa kilid sang suba nga wala sang kasilyas nga nagahaboy sang higko sa mga kasubaan
