ROXAS CITY – Ginpatpat ni City Councilor Dr. Cesar Yap, Jr. Ang importansiya sang antivenom sa mga public hospitals diri sa siyudad sang Roxas.
Sa interview sang Bombo Radyo sa nasambit nga City Councilor, suno diri nga tama ka importante ang pag-angkon sang antivenom sa mga indibidwal nga makagat sang man-og.
Nahibaluan nga luyag magpapasar ni Yap sang ordinansa nga mangin available ang nasambit nga antivenom sa mga pampubliko nga ospital.
Luyag man sini hikayaton ang iya co-chair sa committee on health nga si City Councilor Jericho Celino nga magdihon sang resolusyon nga pabaskugon ang laye sa pagbawal kag pagbakal ukon paghupot sang mga exotic animals.
Matandaan nga sa bulan sang Hunyo sang nagligad nga tuig kun sa diin ginbawian sang kabuhi ang isa ka estudyante sa Barangay Bago, sining syudad, matapos ginkagat sang iya ginahuptan nga isa ka sahi sang cobra.
Suno diri, may tyansa pa nga mabuhi ang isa ka indibidwal nga ginkagat sang man-og kun gilayon ini nga maturukan sang antivenom.
Nagalaum man ang nasambit nga Konsehal nga maaprubahan ang ini nga request sa Sangguniang Panlungsod.
