ROXAS CITY – Ginpatpat ni City Councilor Dr. Cezar Yap Jr., ang kaimportansya sang potassium nga kinahanglan sang lawas sang isa ka-tawo.
Sa interview sang Bombo Radyo Roxas kay Yap, ginpahayag sini nga yara lamang sa 3 tubtob milliEquivalents per liter (mEq/L) ang normal potassium level nga kinahanglan sang isa ka-tawo.
Ginpahayag ni Yap nga may yara sang malain nga epekto sa ikaayong lawas ang manubo nga potassium level sang isa ka tawo kun sa diin ginatawag ini nga “hypokalemia” samtang “hyperkalemia” naman ang tawag sa mataas nga potassium.
Nahibaluan nga isa sa pinakaimportante nga mineral sa lawas sang tawo ang potassium sa diin kinahanglan ini para sa normal nga pagpitik sang korason kag paghulag sang mga muscles sa lawas.
Suno kay Yap ang sintomas sini amo ang pagluya sang mga muscles sa lawas, indi normal nga pagpitik sa korason, gulpi nga pagluya sang ikaayong lawas sang isa ka-tawo kag amat-amat nga pagka-paralyzed sang isa ka tawo.
Ginpahayag man sini nga naganubo lamang ang potassium sang isa ka tawo kun masami ini ginapamalhas, nagapamuhin kag nagasuka.
Ini bangud, nagaguwa ang potassium sa lawas pinaagi sa balhas kag higku.
Magluwas diri, mahimo man nga magnubo ang potassium kun may yara sang diperensya ang kidneys sang isa ka-tawo gani nagaguwa ang potassium pinaagi sa ihi.
Samtang, nagpanugyan naman si Yap nga kun mahimo magkaon sang mga pagkaon nga manggaranon sa potassium kaangay sang saging, laswa kag kun mahimo magpakonsulta gilayon sa doktor agud ma-check ang potassium level sa lawas sang isa ka-tawo.
