ROXAS CITY – Matigdas nga ginpahayag ni Hon. John Paul Arcenas, nga wala nagapangayo sang ‘lagay’ ukon suhol ang City government sa mga proyekto nga nagasulod sa syudad.
Sa interview sang Bombo Radyo kay City Councilor Arcenas, chairman sang Committee on Infrastructure, Public Works and Beautification, wala nagkoordinar ang Department of Public Works and Highways (DPWH) sa pagsugod sang proyekto sa mga dalanon sa syudad.
Suno pa diri, wala nagapamatok ang ila Konseho sa proyekto sang DPWH kun may maayo ini nga resulta sa Roxas City, apang koordinasyon lang ang ila ginahinyo agud nga mangin matawhay ang pagpatuman kag indi maghatag sang huol sa mga pumuluyo kag sa mga motorista.
Wala man suno diri sang mabudlay sa rekisitos sang syudad, sa pagkamatuod, wala na nagakolekta ang city government sang ‘bond’ nga daw kaangay nagaserbe ‘deposit’ halin sa contractor, apang ginabalik man ini sa tion nga wala sang problema sa ila proyekto, sandig sa ordinansa.
Matandaan nga ginkakibot sang pila ka Konsehales ang mga gin-umpisahan nga proyekto sang DPWH sa syudad, nga nagtuga sang pila ka aksidente sa dalan kag paghina sang pila ka negosyo sa mga apektado nga lugar.
Apang matandaan nga sa interview kay Engr. Julius Abela sang DPWH Capiz 1st Engineering District, ginpahayag sini nga nagkoordinar ang ila talatapan sa City Engineering’s office antes ang pagsugod sang ila proyekto, partikular sa Rizal St. nga dalan.
Bangud sini, natalana buwas nga adlaw ang pagsinapol, Setyembre 1, kun sa diin paga-imbitahan ang DPWH, agud hibaluon kun ano ang rason sa wala pag-koordinar sini sa syudad.
