ROXAS CITY -Natalana nga mag-inspection si City Councilor Midelo Ocampo sa mga kabaranggayan sa siyudad nga masami nga ginabahan sa tion nga magbubu ang mamunog nga ulan.
Kasunod ini sang ginpatawag nga Committee meeting sang Committee on Infrastructure sang Sangguniang Panlungsod kun sa diin si Ocampo ang Chairman.
Kalakip sa mga nagtambong sa sinapol amo ang DWPH, City Engineers Office kag mga opisyal sang barangay nga masami ginabaha.
Sa interview sang Bombo Radyo kay Ocampo ginpahayag sini nga ginpasalig sang talatapan sang City Engineers Office nga hatagan sang solusyon ang problema sa mga drainage system sa siyudad.
Ginpasalamatan man ni Ocampo ang mga opisyales sang barangay sa pagtumod sang mga ginatunaan sang pagbaha sa ila nga mga barangay.
Nag-apelar man ang opisyal sa talatapan sang DPWH nga padayunon ang ila sini nga ginpatigayon nga declogging operation sa mga drainage systems sa siyudad.
Ginhinyo man sini ang ahensiya nga hatagan sang proyekto ang mga kabarangayan agud makay-o ang ila tagsa ka mga drainage systems.
Aminado si Ocampo nga dako ang kinahanglanon nga pondo sa nasambit nga proyekto apang bukas ini nga mabulig pinaagi sa Sangguniang Panlungsod nga mahatagan sang pondo ang mga nasambit nga proyekto.
