ROXAS CITY – Pabor si City Councilor Midelo Ocampo nga amyendahan ang number coding scheme kun sa ini nga pamaagi masolusyunan ang ginabakho nga problema sang mga tricycle drivers kag operators kag masabat ang pangabay sang riding public nga tuman na nga nabudlayan bangud limitado lamang ang nagabiyahe nga mga tricycle.
Ginpahayag ni Ocampo nga ila estoryahan sa masunod nga session sang Sangguniang Panlungsod ang tikang nga dapat himoon agud mahatagan sang aksyon ang ginpalab-ot nga sentimyento sang Capiz Tricycle Operators, Drivers and Commuters Alliance (CTODCA) nga hugot nga nagapamatuk sa duha ka ordinansa nga gindihon sang syudad.
Suno sa konsehal nga nagaplano sa karon ang konseho nga ilisan ang number coding scheme sa odd even coding scheme agud makapila ka beses nga makabiyahe ang mga tricycle.
Gin-athag ni Ocampo nga luyag lamang sang gobyerno nga maproteksyunan ang mga pumuluyo bangud sa COVID-19 rason nga ginpatuman ang number coding scheme.
Apang bangud ginakunsidera man sang mga opisyales ang sentimyento sang riding public nga naayawan sang hulat sa pagbantay sang tricycle mas nakita nga solusyon ang pag-amyenda sang ordinansa para sa benepisyo sang tanan.
