ROXAS CITY – Ginpakamaayo nalang ni City Councilor Gonzaga nga indi na magpasaka sang kaso batuk sa lalaki nga nagsaka sa gate sang iya puluy-an sa Barangay Cagay, sini nga syudad kaina sang kaaganhon, Setyembre 7.
Sa interview sang Bombo Radyo kay Konsehal Moreno “Moreng” Gonzaga, suno diri tagaan niya sang tsansa kag pasensyahon danay subong ang lalaki nga ginkilala kay Roberto ‘Ombit’ Lata, residente sang Sitio Andrada, Barangay Banica, Roxas City.
Suno kay konsehal, maayo nalang nga nakit-an sang iya gumangkon si Lata nga nagasaka sa steet gate sang iya balay kag gilayon niya man ini nga nakita sa iya CCTV sa pihak niya nga balay.
Ba-se sa imbestigasyon sang kapulisan suno diri nga posible tuyo sang lalaki nga magpangawat apang indi ini basta-basta makasulod sa puluy-an rason nga nagsaka nalang ini sa ikatlo nga panalgan.
Dugang pa ni Gonzaga nga kasubong yara sa impluwesiya sang droga si Lata bangud lain-lain sini ang iya ginapanghambal kag tuyo pa nga maglumpat.
Naglab-ot man sa tatlo ka oras ang negosasyon sang otoridad kay Lata agud magpanaog ini kag ginbutangan pa ini sang hagdanan, natigayon ini nga makapanaog matapos ginhambalan sang pulis nga nagahulat ang iya pamilya kag kabataan sa iya.
Apisar may hagdanan, ginapahayag naglumpat ang suspek kag masuwerte nga sa ikaduwa nga panalgan ini nag tupa, pananglitan sa ground floor ini nagtupa posible suno kay konsehal nga mangin delekado sini ang iya kahimtangan.
Ginapanugyan ni konsehal sa pumulyo nga piyerme maghalong kag hugton ang seguridad sang tagsa ka panimalay ilabi na nga nagaduging sa karon ang pagpangawat.
