ROXAS CITY – Aminado si City Councilor Moreno ‘’Moring’’ Gonzaga nga nasakitan sa ginbuy-an nga pahayag sang alkalde sang syudad sa ginpatawag nga press conference sang nagligad nga semana sa diin gin-akusahan nga wala sang balasehan ang ginbuy-an nga diskurso pribilihiyo angut sa kabudlay nga na-experiensiyahan sang mga tricycle operators kag drivers sa pagrenew sang franchise sang ila mga tricycle.
Suno kay Konsehal Gonzaga nga indi siya magdeliver sang privilege speech sa sesyon sang konseho sang syudad kun wala ini sang nangin balasehan kag aktwal ini nga nagakahinabo sa karon.
Ginpanindugan man sang opisyal nga madamo nga mga tricycle drivers ang personal nga nagpakigkita sa iya kag gintuad ang ila kabudlayan nga na-experiensiyahan pag-abot sa renewal sang ila frankisa.
Partikular nga gintumod ni Gonzaga si Barangay Kagawad Stephen Abello sang Barangay Lawaan nga gin-ekisan ang iya application kag wala gin-renew ang iya tricycle franchise.
Sang iya gin-usisa si Mr. Edgar Andrade ang pinuno sang Tricycle Franchising and Regulatory Unit (TFRU), ginsabat kay Abello nga may pamulitika bisan sa pagrenew sang franchise sa sulod sang city hall.
Suno kay Konsehal Gonzaga kun indi lamang pag-i-deny ni Andrade ang ginbuy-an sini nga pahayag, mahibaluan sang tanan nga matood ang reklamo sang mga tricycle operators kag indi espekulasyon ukon himo himo lamang.
Ginkumpirma man sini nga sila nga tatlo nanday Konsehal Midelo Ocampo kag Jericho Celino ang masami ginapalapitan sang mga tricycle operators kag ginasugiran.
Wala man nalikawan nga na-mentionar sang konsehal ang iya hinablos kag utod nga wala ginrenew ang frankisa bangud sa apelyido nga Gonzaga.
