ROXAS CITY-Gina-usisa sa karon ni City Councilor Moreno Gonzaga kun ano estado sang pondo nga ginhatag sang National Government sa City Government para sa COVID-19 response.
Sa interview sang Bombo Radyo sa kay Gonzaga ginpahayag sini may yara ini sang nauyatan nga mga dokumento sa ila nga gin-aprubahan nga pondo para sa cremation sang mga napatay nga mga suspected kag positive case sa siyudad.
Suno sa kay Gonzaga nga ginkatingala sini nga wala gina cremate ang mga nagkalamatay nga mga suspected kag positive case sa pihak nga may yara sang kapin P6 Milyones nga pondo nga gin-aprubahan ang konseho para sa cremation.
Gindugang pa ni Gonzaga nga isa pa gid lamang ang gincremate nga covid positive humalin sang una samtang ang iban ang lunsay gina pang lubong na lamang sa mga sementeryo.
Luyag mahibaluan ni Gonzaga kun may yara pa sang nabilin nga pondo ang siyudad para sa cremation sang mga nagkalamatay nga suspect kag positive case.
Magluwas diri, gina-usisa man ni Gonzaga ang mga bulong kag mga vitamins nga ginpondohan man sang nasyunal nga gobyerno nga gin-aprubahan sang konseho sang siyudad nga wala pa napanagtag sa mga kabarangayan.
Ginpahayag ni Gonzaga nga may yara sang P6 milyones nga ginpain nga pondo ang siyudad para sa pagbakal sang mga bulong kag vitamins nga igapanagtag sa mga kabarangayan sa siyudad.
Suno sa kay Gonzaga nga sa ulihe sini nga pakig-angut sa kay City Health Officer Dr. Lory Cahilog sang tinalikdan nga Mayo,ginpahayag ni Cahilog nga nabakal na ang mga nasambit nga vitamins kag yara na sa City Health Office apang tubtob subong wala pa nahatag sa mga kabarangayan.
Samtang ginkompirmar man ni Gonzaga nga may yara sang patigayunon nga committee hearing subong nga adlaw sa City Council agud istoryahan ang nasambit nga butang kalakip na ang protocol sa paglubong sang mga nagkalamatay nga suspect kag covid positive sa siyudad.
