ROXAS CITY – Ginkaalarma ni City Councilor Moreno Gonzaga ang mga nagakahinabo nga diskriminasyon sa syudad angut sa pagpalubong sang mga COVID-19 Suspected Case.
Isa na diri suno sa konsehal amo ang natabo sa isa ka tricycle driver nga residente sang Barangay Cagay kun sa diin ginbalibaran sang lima ka mga ospital sa syudad.
Ini matapos nga ginsuspetsahan nga may COVID-19 apang sa katapusan gindeklarar nga Dead On Arrival.
Gin-usisa man ni Gonzaga ang natabo sadtong Lunes nga adlaw, Setyembre 21 matapos nga may yara sang ginlubong nga duha ka mga persona sa patyo sang Barangay Banica kun sa diin ginapatihan nga COVID-19 Suspected Case.
Ginpahayag sini nga wala sang may natabo nga koordinasyon sa tunga sang Barangay Officials kag katapo sang Roxas City Emergency Response Team (RCERT) rason nga ginkatingala man sang mga pumuluyo.
Ini matapos ginaalegar wala nagsunod sa nagakaigo nga protocol ang mga nagselyo sa lungon nga ginaplastaran sang bangkay sang COVID-19 Suspected Case.
Magluwas diri, nakita man ang mga indibidwal nga wala nagasuksok sang Personal Protective Equipment (PPE), wala sang faceshield, wala man sang gloves kag nagasuksok matuod sang face mask apang yara lamang sa sag-ang.
