ROXAS CITY – Igapatawag ni City Councilor Moreno Gonzaga ang Head sang Tricycle Franchising and Regulatory Unit (TFRU) nga si Mr. Edgar Andrade angut sa mga ginpalab-ot nga reklamo sang pila ka mga drivers kag operators sang tricycle diri sa siyudad sang Roxas.
Sa interview sang Bombo Radyo kay City Councilor Moreno Gonzaga, personal nga nagpadulong sa iya ang pila ka mga drivers kag operators agud nga ireklamo ang ginaalegar indi insakto nga requirement sang opisina ni Andrade.
Suno sa tagreklamo nga ginaalegar ginapasaka sila sa opisina ni Roxas City Mayor Ronnie Dadivas kun mahibaluan nga ginasuportahan nila ang kontra partido nga “pulahan”, rason nga ginkadismaya sang nasambitan nga persona.
Dugang pa ni Gonzaga nga luyag sini nga hibaluon kun kaupod ini sang requirement sa renewal sang prangkisa sang tricycle.
Ginalauman nga magahatag sang sabat si Andrade sa Bombo Radyo Roxas.
