ROXAS CITY – Natalana nga magbisita sa opisina sang Philippine Coast Guard ukon PCG-Capiz ang Chairman sang Committee on Fisheries and Aquatic Resources sa Sangguniang Panlungsod agud hibaluon ang mga tag-iya sang sakayan nga nagapatigayon sang pagpangisda sa Panay River.
Ini ang ginpahayag ni City Councilor Moreno Moring Gonzaga sang mainterview sang Bombo Radyo Roxas.
Kasunod ini sang ginpatigayon nga imbestigasyon sa mga kasubaan kun sa diin nakompirmar sini nga oil spill ang gintunaan sang fish kill sa mga fish cages.
Suno kay Gonzaga nga masami nagalimas sang tubig ang mga sakayan nga nagadungka sa nasambit nga suba kun sa diin may yara ini sang lakot nga oil nga ginahaboy sa suba.
Bangud diri, plano sang konsehal nga ipatawag ang mga tag-iya sang nasambit nga mga sakayan.
Aminado si Gonzaga nga posible wala sang ihibalo ang mga tripulante sang sakayan nga nagalimas sang tubig nga makaapekto ini sa mga fish cages.
Magluwas diri, ginpahayag man sang nasambit nga konsehal nga nagapatigayon na sila sang inspeksyon sa mga kasubaan kun sa diin 50 porsyento na sang mga basura ang nadula.
Matandaan nga gilayon nga ginpalab-ot ni Gonzaga ang natukiban sini sa konseho sang siyudad agud makadihon sang ordinansa nga hatagan sang penalidad ang sin-o man nga magahalit sa kasubaan.
