ROXAS CITY – Nag-apelar sa publiko si City Councilor Midelo Ocampo nga likawan ang pagpalapta sang mga fake news natuhoy sa COVID-19.
Ini ang nangin kaungdan sang iya priviledge speech sa ginpatigayon nga regular session sang Sangguniang Panlungsod.
Sa interview sang Bombo Radyo kay Ocampo ginpahayag sini nga nagtuga sang dugang nga stess sa mga pumuluyo ang mga ginapalapta nga fake news natuhoy sa amo nga balatian.
Suno kay Ocampo nga likawan ang amo nga buluhaton bangod tuman ka sensitibo ang publiko natuhoy sa COVID-19.
Aminado si Ocampo nga isa man ini sa nangin biktima sang fake news kun sa diin ginaalegar nagtaliwan si Punong Barangay Alfredo Albaladejo matapos nga nagpositibo sa amo nga sakit.
Suno sa opisyal nga ginkaalarma sini ang nabaton nga impormasyon apang gilayon sini nga gintawgan kag ginkompirmar kay Albaladejo kun sa diin natukiban sini nga indi matuod ang nasambit nga balita.
Nagpanugyan si Ocampo sa publiko nga magpalapta sang mga mapuslanon nga impormasyon natuhoy sa paglikaw sa COVID-19 sa baylo nga fake news.
Matandaan ang sunod-sunod na ang pagpalapta sang fake news sa siyudad nga ginkaalarma sang kadam-an.
Una diri ang pagpalapta sang fake news nga nagtaliwan na si Punong Barangay Albaladejo bangud sa COVID-19 kag ang pagpalapta sang fake news natuhoy sa pagpositibo sang isa ka senior citizen sa nasambit nga sakit nga sa ulihe nakompirmar nga suspect case pa gid lamang.
