ROXAS CITY – Nagpangabay ang chairman sang Committee on Infrastructure sa Sangguniang Panlungsod sa mga negosyante kag sidewalk vendors nga maapektuhan sa road clearing operation kag istrikto nga pagpatuman sang sidewalk ordinance nga mangin masinulundon sa tikang sang gobyerno.
Sa interview sang Bombo Radyo kay City Councilor Midelo Ocampo, ginpahayag sini nga antes ginsuguran ang implementasyon sang nasambit nga lihok, nagpatigayon sang serye sang kunsultasyon.
Suno pa sa opisyal nga nadihon ini nga tikang bilang pagsunod man sa mandatu sang gobyerno nasyunal pinaagi sa Department of Interior and Local Government Unit (DILG) nga hawanan ang mga karsada nga ginapahamtangan sang iligal nga istraktura kag nagatuga sang kagutok sa trapiko.
Aminado si Ocampo nga madamo kag nagkalain lain nga reaksyon kag feedback ang ginpalab-ot sa iya nga talatapan sang apektado nga mga negosyante.
Apang naghinyo ini sang kooperasyon sa maapektuhan nga negosyante kasunod ang pagpaathag nga ginahimo ini sang gobyerno sang syudad agud makita kag ma-assess ang problema kag matadlong ang sala.
Nagpasalig man si Ocampo nga pagatutukan sang konseho ang mga ordinansa sang syudad kag kun ila makita nga kinahanglan ini amyendahan, ila ini himoon agud makahatag sang kaayuhan sa mga pumuluyo.
