ROXAS CITY – Indi pa handa ang syudad sang Roxas sa ginpapanaug nga Memorandum Circular 036-2020 sang Department of Interior and Local Government (DILG) nga nagadumili sa mga tricycle kag mga pedicabs nga mag-agi sa national highways.
Ginpahayag ni City Councilor Midelo Ocampo nga ba-se sa iya obserbasyon nga sa karon indi pa preparado ang Roxas City para mapatuman ang direktiba sang DILG, bangud ang mode of transportation sa syudad ang tricycle.
Kun dumilian ang mga tricycle nga mag-agi sa national highways kasubong sa ginasaad sa MC 036-2020, maperwisyo ang mga commuters kag madulaan sang palangabuy-anan ang mga tricycle drivers.
Apang aminado ini nga isa ka paghangkat sa ila sa City Council kun paano nila masolusyunan ang nasambit nga isyu.
Nagapati man si Ocampo nga dapat man nga imbentaryuhon ang dalanon sa Roxas City kun diin ang national highway agud madeterminar ang karsada nga pagaagyan sang tricycle.
Apang sa pagpangusisa ni Ocampo nagaguha nga kadam-an sa mga dalanon sa syudad ang national highway.
Aminado ang opisyal nga maayo man ang katuyuan sang DILG , apang kuntani unahon ang implementasyon sini nga direktiba sa mga urbanized cities nga posible ginba-se lamang sa mga dalagkuan nga syudad nga indi aplikable sa Roxas City nga gamay lamang nga syudad kag ang mode of transportation amo ang tricycle.
Samtang ginkumpirma ni Konsehal Ocampo nga nagpakigkita na sa iya si Mr. Wilson Devela, ang presidente sang Roxas City Tricycle Operators and Drivers Association kag naghinyo nga buligan nga makigkita sa alkalde sang syudad agud ila personal nga mapalab-ot ang concern sang mga operators kag drivers.
