ROXAS CITY – Ginakasubo ni City Councilor Midelo Ocampo ang nangin akusasyon sa iya sang nagapungko karon nga punong barangay sang Barangay Milibili nga siya ang yara sa likod sang indi makita nga mga dokumento nga kinahanglanon kuntani para makapasakup ang amo nga barangay sa Lupong Tagapamayapa Incentives Award sang DILG.
Ginpahayag ni Konsehal Ocampo nga indi siya ang dapat basulon kun wala ma-evaluate sang mga evaluators ang Barangay Milibili bangud desisyon ni Kapitan Annabelle Roxas nga indi magpasakup sa nasambit nga kumpetisyon sang DILG.
Suno pa sa opisyal nga nasubuan man ini bangud kasubong nagkadto lamang sa wala ang ila mga pagtinguha nga mahatagan sang bugal ang barangay pinaagi sa mga inobasyon, best practices agud mapaayo ang justice system sa barangay.
Ginapanindugan man ni Ocampo nga may yara sang steel cabinet sa diin naka-file ang mga dokumento agud ma-mentenar ang mga records sang ila barangay.
Yara man suno sa opisyal si Kapitan Roxas nga sadto barangay kagawad pa lamang sang ginpresentar ang mga dokumento sa mga evaluators nga nagtsekyar.
Imposible suno diri nga ila pa dalhon ang mga dokumento pagkatapos nga matsekyar sang mga evaluators.
Nagapati man si Ocampo kun may problema gid man, kuntani nagpalapit sa iya si Roxas bangud yara lamang ini sa ila nga balay.
Wala man nalikawan ni Councilor Ocampo nga magpalayag sang kalain sang buot kay Kapitan Roxas, bangud kasubong indi sini mabatyagan nga luyag sini nga mangin partner siya sa paghatag sang maayo nga serbisyo sa ila barangay.
Ginpanindugan pa sang opisyal nga sa pihak nga yara na siya sa konseho sang syudad, apang handa siya magbulig kag magserbisyo sa gihapon sa iya mga kasimaryo nga nangin malapit na sa iya tagipusoon.
Sa iya nakita kasubong nga luyag ni Roxas nga mag-establisar sang iya liderato sa barangay.
Apang suno kay Ocampo nga paano mangin maayo nga lider ang isa ka opisyal kun indi ini makahibalo magkilala sa nahimuan sang iya ginsundan.
