Gin-athag sang chairman sang Committee on Rules and Ordinances sa Sangguniang Panlungsod nga wala nagapamalabag ang duha ka mga kaupod nga konsehal sa kontrobersiyal nga Memorandum of Agreement (MOA) para sa emergency loan sang mga tricycle drivers sa syudad sang Roxas.
Ginhimo ini nga pahayag ni City Councilor Paul Ivan Baticados agud tadlungon ang nagalapta nga estorya kag klaruhon ang isyu.
Suno sa konsehal nga antes ihatag ang otoridad sa alkalde sang syudad sa pagpirma sa MOA, kinahanglan nga tun-an kag tsekyaron bangud makabig ini nga tumalagsahon nga sahi sang MOA.
Ginrefer sa duha ka mga komitiba nga ginalakipan sang Committee on Rules and Ordinances sa idalum sang chairmanship ni Baticados kag Committee on Public Utilities ni Konsehal Gregory Potato agud matun-an pa sang maayo kag indi mabutang sa disbentaha ang mga tricycle drivers.
Natalana nga magpatigayon sang committee hearing ang Sangguniang Panlungsod angut sa proposed loan sa mga tricycle drivers sa masunod nga mga inadlaw.
Paga-imbitahan man sang konseho ang representante sang Gerry Roxas Foundation, Office of the City Mayor, Commission on Audit (COA) kag iban pa para mahinalaan ang pila ka napagkit sa MOA.
Ginapanindugan ni Baticados nga importante nga tun-an ang MOA kag indi basta na lamang nga aprubahan.
Samtang wala sang nakita nga malain ang nasambit nga konsehal sa pagkwestyon sang duha ka mga kaupdanan sa city council bangud luyag lamang sang mga ini nga masiguro nga plantsado ang tanan antes aprubahan ang MOA bangud isa lamang ang katuyuan sini nga mabuligan nga makabangon ang mga drivers nga apektado sang Libre sakay kag pandemya.
Nauna diri ginsiling nga ang gintan-ay sang gobyerno amo ang pag-abaga sa interes sa emergency loan nga ma-avail sang mga drivers kag ang ila na lamang pagabayaran amo ang kapital sa ila gin-utang.
