ROXAS CITY-Natalana nga pagatalakayon sang Sangguniang Panlungsod kun ano ang masunod nga tikang sang konseho sa plano sang Metro Roxas Water District (MRWD) nga pagbakal sang bulk water sa isa ka pribado nga supplier.
Ini ang ginkompirmar ni City Councilor Paul Ivan Baticados sang mainterview sang Bombo Radyo.
Suno kay Baticados nga pagahinalaan pa sang konseho kun magadihon sila sang resolusyon nga naga-oponer sa pagbakal sang MRWD sang tubig sa isa ka pribado nga supplier sa sulod sang 15 katuig.
Ginpahayag pa sini nga ginkakibot sang konseho ang ginpresentar nga plano sang MRWD nga magsulod sa amo nga transaksyon nga wala anay ginpalab-ut sa konseho sang siyudad antes nga gindesisyonan sang mga Board of Directors ang nasambit nga plano.
Nagpalab-ot man ini sang suhestiyon sa MRWD nga dapat maghilisugot ang mga empleyado kag mga Board of Directors sa ila sini nga plano bangud nagasalungkaki ang ila sini nga panan-awan.
Aminado si Baticados nga mabudlay para sa MRWD nga magpatigayon sang nasambit nga plano kun sila man mismo sa sulod sang talatapan ang wala naga intiendihanay.
Samtang ginpanindugan man ni Baticados nga isa ini sa mga maga-oponer sa plano sang nasambit nga talatapan.
Nagapati si Baticados nga kun madayon ang nasambit nga plano, dako ang posibilidad nga may yara sang rate increase sa balayran sa tubig nga abagahon man sang mga kunsomidor.
Ginakusiderar man sini ang ideya nga magtipon sang pondo ang MRWD para sa pagpakay-o sang mga samad nga pasilidad sa baylo nga mag-utang kag magbakal sang tubig sa isa ka pribado nga supplier.
