ROXAS CITY – Nagpaathag si City Councilor Albert Gregory Potato natuhoy sa ginapatuman nga border restrictions sa siyudad sang Roxas.
Sa exclusive interview sang Bombo Radyo, ginpahayag sang konsehal, nga indi na kinahanglan pa sang mga residente sang Roxas City nga mag-presentar sang health certificate sa mga border security checkpoints.
Suno diri nga kinahanglan lamang nila mag-presentar sang valid ID nga nagapamatuod nga residente sila sang siyudad.
Ang gina-obligar lamang suno diri nga mag-presentar sang health certificate amo ang mga indi sang taga-Roxas apang diri nagatrabaho sa siyudad bilang pamatuod nga indi sila sang Person Under Investigation (PUI) ukon Person Under Monitoring (PUM) sa ila ginhalinan nga banwa.
Magluwas sa health certificate, kalakip sa ginapangayo sa mga ini amo ang ila nga company ID, certificate of employment.
Ginpanindugan sang konsehal nga kinahanglan ang hugot nga border restrictions sa siyudad sang Roxas gikan sa mga iban nga banwa bangud ang Roxas City ang sentro sang tanan kalakip na ang komersiyo, businesses, bangko, ospital kag iban pa kun sa diin nagadugok ang madamo nga tawo.
Bangud diri, nagpanugyan na lamang ang konsehal sa mga residente sang iban nga banwa nga ipaiway na lamang ang pagpadulong sa siyudad kun wala man sang importante nga transaksiyon ukon kinahanglanon.
Ginklaro man ni Potato nga sa kinaandan, may yara sang bayad sa pagkuha sang health certificate apang bangud sang krisis nga ginapangatubang sa karon tuga sang coronavirus disease (COVID-19), ginpaiway ang pagpanukot sini kun gamiton ang amo nga dokumento para sa border restrictions.
