ROXAS CITY – Nagpanugyan si City Councilor Dr. Cesar Yap Jr., sa publiko nga magkaon sang mga masustansiya nga pagkaon kapareho sang prutas kag utan agud malikawan nga malatnan sang Novel Coronavirus Acute Repiratory Disease (NCOV_ARD).
Ginpahayag ni Yap nga kun mahimo magtulog sang nagakaigo nga oras, maggamit sang face mask, magpahuway sang insakto, magkaun sang masustansiya nga pagkaun, mag-inom sang madamo nga tubig, kag magtumar sang mga bitamina agud mapabaskog ang immune system.
Kun nakabatyag naman sang sintomas, kinahanglan gilayon nga magkadto sa ospital para sa monitoring kag likawan man ang mga tawo nga nagasuprer sang ubo, sip-on, lagnat ukon iban pa nga sintomas nga nagapakita sang senyales sa pag-angkon sang novel coronavirus.
Magluwas diri, takpan ang bibig kun mag-ubo kag masami maghugas sang kamot agud malikawan ang paglapta sang nasambit nga virus.
Samtang, nakapagkit na karon sang duha ka Person’s Under Investigation ang Capiz Provincial Health Office kag ginpaidalom na sa 14 days quarantine ang nasambit nga mga pasyente.
