ROXAS CITY – Gin-inagurahan na subong nga adlaw Oktubre 20 ang City Diagnostic and Laboratory Center sa siyudad sang Roxas agud magpatigayon sang Real Time-Polymerase Chain Reaction or RT-PCR Test sa Hortus Botanicus, Barangay Milibili, Roxas City.
Iti matapos nakapasar na sa Proficiency Test for Sars-COV-2 Detection kag nakakuha sang 100% Proficiency Score Test Score sang Department of Health Research Institute for Tropical Medical Molecular Laboratory.
Sa interview sang Bombo Radyo kay City Mayor Ronnie Dadivas nga naglab-ot sa P24 milyones ang kabug-usan nga kantidad nga nagastos para sa nasambit nga pasilidad.
Ginpahayag sang alkalde nga daku ini nga bulig sa probinsya partikular na sa mga residente sang siyudad sang Roxas agud nga magpaidalom sa swab test kag mangin madasig ang paguwa sang resulta.
Suno kay Dadivas nga “all set” na tanan ang mga kagamitan ukon machine nga kinahanglanon kag kumpleto naman ang mga medical personnel nga magaasikaso sa amo nga pasilidad.
Pagabuksan ini adlaw-adlaw umpisa alas 7 sang aga tubtob alas 7 sang gab-i kun sa diin target nila nga maka-examine sang kapin sa 100 ka mga specimen sa isa ka adlaw.
Mahibaluan nga libre ang pagpaidalom sa swab test kun residente sang siyudad nga eligible kag kwalipikado ukon mga indibidwal nga ginrefer naman sang City Health Office.
Apang, kun personal lamang ini nga interest kag ‘walk-in” may yara ini sang pagabayaran ang luyag magpa-test.
Ini nga tikang sang gobyerno dugang pa ni Dadivas ang makabulig sa mga tawo kun sa diin ginapahayag nga tatlo ka-adlaw ang maximum agud mabal-an ang resulta sang ila ginpatigayon nga eksaminasyon.
Samtang, nangin dinapit naman nga mga bisita sa nasambit nga inagurasyon amo ang DOH-6 Regional Director Marlyn Convocar kag pila ka mga opisyal sang gobyerno.
