ROXAS CITY-Ginsabat sang pamunuan sang City Disaster Risk Reduction ang Management Office ang concerned nga ginpalab-ot sang Punong Barangay sang Barangay Lanot sining syudad kasunod sang pagpauli sang isa ka ginapatihan Locally Stranded Individuals (LSI) sa nasambit nga barangay sa pihak nga wala pa nagtakup ang 14-day moratorium.
Ginpahayag ni CDRRMO Head Mr. Dennis Saneo nga may yara sang 14 ka mga nurses nga nagpauli sa probinsiya nga gikan sa Metro Manila.
Ginkompirmar sini nga kalakip sa nagpauli ang gintumod ni Punong Barangay Rolando Tuazon nga isa ka LSI.
Apang gin-athag ni Saneo nga indi Locally Stranded Individual ang gintumod ni Tuazon bangud isa ini ka nurse kag makabig nga Authorized Person Outside Residence ukon APOR.
Gindugang pa ni Saneo nga kumpleto sang mga rekisitos ang ginatumod ni Tuazon kalakip na ang Certificate of Employment, Mission Order, kag Valid IDs.
Gin-athag man sini nga wala malakip sa 14- day moratorium, gin-aprubahan sang Regional Inter-Agency Task Force ang mga APOR kag Returning Overseas Filipinos (ROF).
Suno kay Saneo nga ginpasugtan ang mga ini nga magpauli kun may yara sang ipresentar nga rekisitos kag magasunod sa minimum health protocols.
Matandaan nga nagpalab-ot sang concern si Punong Barangay Rolando Tuazon sang Barangay Lanot sining siyudad matapos nga may isa ka ginapatihan Locally Stranded Individual ukon LSI nga nakapauli sa ila nga barangay.
