ROXAS CITY – Ginbisitahan sa ospital sang pila ka mga opisyales sang siyudad sang Roxas kag mga katapo sang City Social Welfare and Development Office (CSWDO) ang tricycle driver nga na-stroke apang una nga nasal-an nga nakainom sang mga kapulisan kag katapo sang Roxas City Emergency Response Team (RCERT).
➠Lalaki nga nasal-an hubog, na-stroke; mga pulis ginabasol sang asawa sa nadangatan sang bana
Ini ang ginkompirmar ni Mr. Melvin Galagate sang Roxas City Communications Group sang mainterview sang Bombo Radyo.
Suno kay Galagate, matapos mabalitaan ni Roxas City Mayor Ronnie Dadivas ang natabo sa tricycle driver nga si Rolando Apanitan sang Barangay Gabuan, sining siyudad, gilayon nga nagmandu ang alkalde nga bisitahan ang biktima sa ospital.
Diri suno kay Galagate gin-usisa ang pamilya ni Apanitan natuhoy sa ila mga kinahanglanon para sa pagpabulong sa biktima.
Suno kay Galagate nga ginapasalig sang alkalde sa pamilya Apanitan nga ila ini nga pagabuligan tubtob sa mag-ayo ang biktima.
Kinahanglan lamang suno diri nga mahitsu sang pamilya sang biktima ang pila ka mga kinahanglanon agud makabaton sila sang bulig-pinansiyal kalakip na diri ang medical certificate, hospital bill, certificate of indigency kag iban pa.
