ROXAS CITY – Nagdepensa ang pamunuan sang City Health Office natuhoy sa ginaalegar pagbalibad sang ila birthing clinic sa 30 anyos nga babaye nga taga-Sitio Luyo, Barangay Culasi, Roxas City nga manugbun-ag sang iya anak.
Suno kay Dr. Lory Cahilog, wala sang kamatuoran nga ginbalibaran ang amo nga babaye sang mga naga-duty sang tion nga nagpadulong ini sa talatapan sadtong Dominggo sang gab-i.
Ginpahayag sini nga bangud may yara sang mga nagakaigo nga protocols nga kinahanglan sundon, nagpaidalom sa pag-usisa ang amo nga babaye sa triage area.
Sang gin-check ang iya record suno kay Cahilog natukiban nga makaduha ka beses lamang ini nagpa-pre-natal kag wala man nagpaidalom sa laboratory sang siya ang ginpanugyanan.
Nahibaluan pa nga ang ginadala sang babaye sa iya tagu-angkan ang ika-lima na sini nga anak.
Bangud sa sini nga mga butang, makabig nga ‘high-risk’ ang amo nga babaye rason nga ginpahulat anay ini sang makadali bangud iga-refer ini sa Roxas Memorial Provincial Hospital.
Matapos matawagan ang RMPH agud ma-refer ang ginang, ginguwaan ini apang wala na ini bangud wala na sila nakahulat.
Sa pagpangusisa pa ni Cahilog sa mga on-duty sadto nga tion, ginapahayag nga base sa ila assessment, indi pa man sang manug-anak ang babaye kag wala man suno diri nadugayan gid ang iya paghulat.
Wala man suno diri sang diskriminasyon nga natabo bangud lamang taga-Barangay Culasi ang ginang bangud sa amo nga adlaw suno kay Cahilog, may nagbata man sa ila birthing clinic nga halin sa amo nga barangay.
Apang ginklaro ni Cahilog nga kinahanglan lamang magsunod sa pila ka mga pagsulundan ilabi pa nga nagapangatubang sa karon sa pandemiya tuga sang coronavirus disease (COVID-19).
