ROXAS CITY – Temporaryo nga ginpasarado subong nga adlaw, Setyembre 14 ang Roxas City Health Office matapos nga ipaidalom ini sa disinfection kasunod sang pagpositibo sa COVID-19 sang isa sa ila mga empleyado.
Ini ang ginkompirmar ni Dr. Lory Cahilog sang mainterview sang Bombo Radyo.
Suno kay Cahilog nga ginhimo nila ini nga tikang agud malikawan nga malatnan sang nasambit nga balatian ang iban nila nga empleyado.
Mahibaluan nga nag request si Cahilog sa City Government nga ipaidalom sa disinfection ang amo nga opisina.
Ginpahayag sini nga kahapon nga adlaw nag-abot ang resulta sang RT-PCR ukon swab test sang amo nga empleyado kun sa diin positibo ini sa nasambit nga virus.
Sa karon, nagapaidalom na ini sa 14 day mandatory quarantine kag nagapadayon man ang contact tracing sa mga indibidwal nga naka-close contact sini.
Apisar nga wala ini sang may nabatyagan nga sintomas sang COVID-19, ginpauntat na ini sa pag-duty sadtong Setyembre 2 matapos nga naka-close man ini sadto sa nagpositibo rason nga ginpaidalom na lamang ini sa swab test.
Samtang, ginpahanumdom naman ni Cahilog nga kun magbalik na ang operasyon buwas nga adlaw sang ila nga opisina istrikto nila nga gina-implementar sa mga nagakadto kag empleyado ang mga minimum health protocol.
Kapareho na lamang sang pagsuksok sang facemask kag faceshield subongman ang pag-obserbar sang physical ukon social distancing kag limitado nga numero sang mga nagasulod nga mga tawo.
Samtang, ginpahayag naman sini nga indi pa mabal-an kun san-o magabalik ang operasyon sang Birthing Clinic matapos ginpasarado man ini sang damlag lang.
Nagpanugyan naman si Cahilog nga kun indi man lang sang importante ang transaksyon sa ila nga opisina mas maayo na lamang nga magtinir sa ila nga balay.
Magluwas diri, mahimo man nga magpakig-angut pinaagi sa E-Consultant kun sa diin mahimo man sila diri makapamangkot natuhoy sa ila ikaayong lawas.
