ROXAS CITY – Aminado si Roxas City Mayor Ronnie Dadivas nga madamo sang maapektuhan sa igapatuman nga curfew hours sa siyudad sang Roxas sandig sa implementing guidelines sang Memorandum Order No. 11, series of 2020 ni Capiz Governor Esteban Evan ‘Nonoy’ Contreras agud mapunggan nga makasulod sa probinsiya ang coronavirus disease (COVID-19).
Suno kay Dadivas una nga maapektuhan diri amo ang mga negosyante nga naga-operate kun gab-i kag ang mga temprano pa nagabukas.
Ginpahayag pa sang alkalde nga labing maapektuhan man sa amo nga pagsulundan ang mga tricycle drivers ilabi na ang naga-biyahe kun gab-i.
Gindugang pa sini nga may mga persona man nga nagatrabaho kun gab-i nga maapektuhan sa ipatuman nga curfew hours.
Mahibaluan nga magasugod ang curfew hours alas-8:00 sa gab-i tubtob alas-5:00 sa kaagahon sumugod Marso 18, 2020.
Mahibaluan nga tanan nga mga pumuluyo sang probinsiya ang sakop sang curfew hours magluwas gid lamang sa mga law enforcers; persons on emergency health situations nga kinahanglan sang medical attention; government and private employees kalakip na ang mga health workers nga ang trabaho ang natuon sa curfew hours; mga nagatrabaho nga natuon sa curfew hours sa pag-deliver sang goods kag services; kag mga nagatrabaho sa BPO’s sa baylo nga ma-comply nila ang mga rekisitos nga ginapangayo.
Ginklaro naman sang alkalde nga ang pagpatuman sang curfew hours ang indi niya sang mandu kundi mandu sang gobernador sandig sa ginpapanaog sini nga Memorandum Order.
Ginpahayag pa ni Dadivas nga magahinala man sila sang gobernador agud maathagan sa pagsulundan sa pagpatuman sang curfew hours sa siyudad.
