ROXAS CITY – Hugot nga ginakondenar ni Roxas City Mayor Ronnie Dadivas ang ginhimo nga pagpangsabotahe sang wala pa matumod nga mga indibidwal pinaagi sa tuyo nga pagpangguba sa Roxas City fountain.
Suno sa alkalde nga mangin siya ang nakibot sang gintundaan ini nga may yara sang duha ka mga indibidwal nga nagasuksok sang helmet kag nagasakay sa motorsiklo ang nagbubo sang makahalalit nga kemikal nga amo ang bleach kag powder nga sabon sa amo nga fountain.
Suno diri nga bangud sang nasambit nga mga kemikal, mahimo nga maguba ang teknikal nga mekanismo sang interactive lighting nga ginpahamtang sa lugar.
Blangko naman ang alkalde kun sin-o ang yara sa likod sini apang kumbinsido si Dadivas nga indi ini sang basta-basta na lamang nga pagpang-tripping kundi hungod nga pagpangsabotahe sa siyudad.
Suno pa kay Dadivas nga ginahimo sini ang kutob sang iya masarangan agud mangin matahom, progresibo kag world class ang siyudad sang Roxas apang wala ini nagalaom nga may magasabotahe sa iya mga ginahimo.
Ginatugyan naman sang alkalde sa Roxas City Police Station ang pag-imbestigar diri bangud luyag sini nga mapasabat ang sinuman ang may kahimuan sang nasambit nga butang.
Samtang tuman naman ang pagpasalamat sang alkalde sa mga positibo nga komento sa bag-o gid lamang nagtakop nga Sinadya 2019.
Nagpasalamat man ini sa tanan nga nagbulig kag naghugpong agud mangin madinalag-on ang nasambit nga selebrasyon.
