ROXAS CITY – Paga-usisaon pa ni Roxas City Mayor Ronnie Dadivas ang contract of lease sang Pueblo de Panay wet market sa Barangay Lawaan, Roxas City.
Ini ang kasunod sang pagpalab-ot sang reklamo sang mga vendors sa amo nga merkado-publiko bangud sang pag-utod sang kuryente sa lugar.
Nagapati ang alkalde nga indi sang obligasyon sang siyudad nga bayaran ang kuryente sa amo nga pasilidad bangud ang nagakadapat nga magbayad sini amo ang nakapangalan sa contract of lease.
Dugang pa diri suno sa alkalde, wala sang pa sang may ginabayad nga monthly rental ang leasor sang amo nga pasilidad kag wala pa man sang may ginasukot nga charges ang gobyerno sang siyudad.
Ginpahayag pa sini nga wala man sang may ginpresentar sa iya nga feasibility study sang operasyon sang wet market, kag wala man siya sang may nakita nga contract of lease sang transition period sang iya administrasyon.
Magluwas diri suno sa alkalde wala man siya sang nakit-an nga method of selection of award para sa amo nga pasilidad kag ordinansa nga nasaad ang operasyon sini.
Suno pa kay Dadivas nga kun mapamatud-an nga isa ka maayo nga economic enterprise sang siyudad ang amo nga pasilidad, mahimo ini nga mapadayon sang iya administrasyon apang kun indi, mas maayo suno sa alkalde nga i-convert na lamang ini sa iban nga economic enterprise.
Matandaan nga ang nasambit nga pasilidad ang ginduso nga mapatukod sang administrasyon sang sadto anay alkalde nga si Angel Alan Celino nga ginpondohan sang kapin 124 milyones pesos.
