ROXAS CITY – Magapangusisa si Roxas City Mayor Ronnie Dadivas natuhoy sa ginpalab-ot nga reklamo sang grupo sang mga manugbaligya sa Teodoro Arcenas Trade Center (TATC) may kahilabtanan sa ginaalegar indi maayo nga batasan sang mga miyembro sang Roxas City Environmental Sanitation Enforcement Team (RESET).
Ini ang ginpahayag mismo sang alkalde sang mainterview sang Bombo Radyo Roxas.
Suno kay Dadivas nga magalibot ini sa nasambit nga merkado-publiko agud magpangusisa sa mga manugbaligya kun ano ka matuod ang amo nga reklamo agud gilayon ini nga aksiyunan.
Mahibaluan nga nagdihon sang isa ka petition letter ang pila ka mga vendors kun sa diin pirmado ini sang kapin 200 ka mga indibidwal nga may katuyuan nga mapalab-ot sa alkalde sang syudad ang ginaalegar indi maayo nga pamatasan nga ginapakita sang miyembro sang RESET nga sanday Primo Golinggay, Marcial Gaya-Gaya, Efren Diaz kag Limuel Bodegas.
Partikular nga gintumod sang mga ini ang pagpangharass sa ila sang grupo sa tagsa ka maglibot sila sa merkado publiko kag kun may makita nga wala nagasunod sa pagsulundan.
Nahibaluan nga matapos kumpiskahon ang ila ginabaligya, ginadala ini sa opisina sang RESET kag gina-estorya sila kadungan ang paandam.
Wala man nauyunan sang mga vendors ang pag-akig sa ila sa tagsa ka magsabat sila, sa diin kasubong nga wala sila sang kinamatarung magsabat bangud ginasiling nga ginahimo lamang sang RESET ang direktiba sang alkalde.
