ROXAS CITY – Nagpakigsapol si Roxas City Mayor Ronnie Dadivas sa mga manugbaligya sa Teodoro Arcenas Trade Center.
Ini agud mapamatian ang bahin sang mga manugbaligya natuhoy sa ila ginareklamo nga ginaalegar indi maayo nga batasan kag pagpangsita sang pila ka mga katapo sang Roxas City Environment and Sanitation Enforcement Team (RESET).
Diri ginpahangop sang alkalde kun ano ang mga laye kag pagsulundan nga ginapatuman sang mga miyembro sang RESET.
Nagaapelar man ini sa mga manugbaligya sang kooperasyon agud mapabilin nga matinlo kag matalunsay ang sitwasyon sa nasambit nga merkado-publiko.
Ginpanindugan naman ni Dadivas nga indi sini luyag nga ginagamit ang iya pangalan sang mga taga-RESET sa tion nga sila ang magpangsita sang mga vendors.
Suno sa alkalde nga indi siya ang nagamandu sa mga taga-RESET kundi amo ang laye nga kinahanglan sundon sang tanan kag mangin siya man apisar pa nga alkalde ini sang siyudad.
Nagaapelar naman ang isa ka fish vendor sang kooperasyon sa tagdumalahan sang TATC ilabi na kun may mga ginapalab-ot sila nga mga problema.
Suno diri nga makapila ka beses na sila nga nagpalab-ot sa tagdumalahan sang merkado-publiko natuhoy sa naguba nga porsyon sang merkado sang nagpanalasa ang bagyo apang tubtob subong wala ini maaksyunan.
Luyag naman matadlong sang isa man ka fish vendor ang batasan sang mga taga-RESET ilabi na sa pamaagi sa pagsita sa ila nga mga manugbaligya.
Gindugang pa sang isa ka manugbaligya nga gilayon nga ginakuha ang ila baligya kag ginahaboy sang mga taga-RESET kag wala man lang sila ginapaandaman.
