ROXAS CITY – Nagakahangawa si City Mayor Ronnie Dadivas bangud sa kulang nga koordinasyon kag short notice nga pagpatigayon sang mga special flights sa probinsya.
Ini ang ginpahayag sang alkalde sa iya nga official statement subong nga gab-i pinaagi sa iya facebook post.
Suno kay Dadivas nga dapat may yara sang tama nga abiso agud mabal-an sang tanan kun masarangan pa sang mga kabarangayan nga magbaton sang mga LSI’s sa ila quarantine facilities.
Gin-athag naman sang alkalde nga wala ini nagapamalabag sa pagpapuli sa mga LSI’s apang dapat may yara sang nagakaigo nga koordinasyon agud nga mahilway kag mahagan-hagan ang pagdamo sang kaso sa COVID-19 sa siyudad kag probinsya.
Samtang, ginakasubo naman ni Dadivas ang pagdugang sang isa naman ka panibag-o nga kaso sang COVID-19 sa siyudad kahapon nga adlaw, Agosto 20,2020.
Ini matapos nagpositibo ang isa ka 39-anyos nga lalaki nga residente sang Barangay Inzo Arnaldo Villagae sining siyudad kag nagatrabaho sa Capiz Provincial Capitol kag wala sang travel history sa mga lugar nga infected sa virus.
Sa karon, padayon na ini nga ginabulong sa Roxas Memorial Provincial Hospital humalin sang Agosto 17, 2020 bangud isa ini ka symptomatic case ukon nakabatyag sang sintomas sang amo nga balatian.
Nagpangabay naman si Dadivas nga mag-doble halong agud malikawan ang paglapta sang amo nga virus.
